Uvas e viños de Galicia

Introducción

A viticultura galega proporciona viños de excelente calidade tanto monovarietais como plurivarietais, baseados en castes de uvas ancestrais anteriores á praga da filoxera.

Os brancos son os máis coñecidos, coa variedade albariño como protagonista nas Rías Baixas; no Ribeiro mestúranse variedades, con predominio da treixadura; mentres que no interior de Galicia (Ribeira Sacra, Valdeorras e Monterrei) predomina a godello. Outras castes arraigadas desde antigo, sobre todo nos viños plurivarietais, son a torrontés, a caíño branco, a loureira, dona branca e lado. Nas demarcacións cualificadas como Viños da Terra destaca a variedade branca lexítima.

Nos tintos, a variedade mencía é a raíña na Ribeira Sacra e Valdeorras, e a máis cultivada en zonas onde predominan os brancos como Monterrei ou o Ribeiro. Xunto a esta úsanse outras variedades prefiloxéricas como sousón, caíño (longo, bravo e tinto), brancellao e merenzao. Tamén castes ancestrais minoritarias se están a recuperar nas súas zonas de orixe como a espadeiro, castañal e pedral nas Rías Baixas, ferrón no Ribeiro e mouratón na Ribeira Sacra.

A produción dos viños plurivarietais pódese completar con outras uvas: os brancos con palomino, albillo e chenín branco; os tintos con garnacha e tempranillo.

A produción comeza a diversificarse coa comercialización de viños espumosos e a recuperación do viño tostado, un viño doce obtido das mellores uvas.