Un ano máis, o Ourense Film Festival (OUFF) permite coñecer de primeira man aqueles lugares da provincia ourensá que foron empregados como set de rodaxe para a gravación dalgunhas das series e películas máis recoñecidas e premiadas dos últimos anos, ademais de poñer en valor as paisaxes naturais das vilas más fermosas da provincia.
𝐑𝐨𝐭𝐞𝐢𝐫𝐨 𝐝𝐨 𝐯𝐞𝐧𝐫𝐞𝐬 𝟑 𝐝𝐞 𝐨𝐮𝐭𝐮𝐛𝐫𝐨 (𝐋𝐞𝐢𝐫𝐨-𝐑𝐢𝐛𝐚𝐝𝐚𝐯𝐢𝐚-𝐌𝐞𝐥𝐨́𝐧).
O día comezará no mosteiro de San Clodio para visitar os espazos nos que se rodaron filmes como «Los girasoles ciegos» e «Cuñados». A ruta continuará no Museo do Viño de Galicia, onde se realizará unha visita ao lugar de rodaxe da curtametraxe «Fillas do Ribeiro» e aos viñedos da zona. En Ribadavia coñeceranse no barrio xudeu os escenarios de «A Esmorga»; os de «Cotolay» na taberna da Papuxa; a igrexa de San Antón evoca a serie de «El desorden que dejas»; e o paseo do río Avia segue sendo testemuña da historia de «Olvido y León». A derradeira parada será en Melón, onde se produciron escenas para «Las brujas de E´lente» e «Cotolay».