Os antigos romanos tiñan unha cultura vitivinícola tan interesante como ampla polo que podemos atopar nela tantas variedades de viño como formas de elaboralo. Ben coñecido por todos nós é o viño tostado, tan doce e prezado e vencellado ás clases máis altas da sociedade. Sen embargo, os romanos tiñan outro viño característico igualmente doce preparado a partir de mel. Este era o chamado viño 𝐦𝐮𝐥𝐬𝐮𝐦, ao cal se lle engadía este ingrediente para buscar a mellora do sabor e aroma.
Pero, que porcentaxe de mel era a máis axeitada? O certo é que esta variaba dependendo do autor clásico que consideremos. Columela, romano do século I a.C., aconsellaba dez libras por cada urna ou genus, recipiente que equivalía a 13,13 litros (libro XII, 51). Outros como Dioscórides (s. I d.C.) aseguraban que había que misturar dúas metretas de viño (unha metreta son 38,88 l.) por unha de mel.
Este tipo de viño incluíase nos banquetes romanos durante os 𝘨𝘶𝘴𝘵𝘢𝘵𝘪𝘰 ou entremeses. Tiña diversas propiedades mediciñais que favorecían a dixestión e servía como remedio laxante, e incluso se empregaba como ungüento para as afeccións das patas do gando.