Ben necesarios son os sacarrollas. Con eles abrimos as botellas de viño para poder gozar do seu contido. Aínda que hoxe en día este mecanismo facilítanos a vida grazas á súa continuada evolución e ao enxeño dos seus fabricantes, non sempre foi así de moderna e doada de empregar esta peza que gardamos nalgún caixón da casa.
O primeiro sacarrollas coñecido como tal fabricouse en Francia en 1685, mais curiosa é a súa orixe, que se remonta ás antigas barrenas empregadas pra limpar os restos de estopa das armas.
A palabra que podería definir aos primeiros sacarrollas é a de arcaicos ou sinxelos, tanto no emprego como na estrutura, e todos eles están formados polo xeral por unha espiral de ferro que penetra no tapón de cortiza e uns brazos aos lados para facilitar a extracción.